एस् ए टी भी, १० असोज काठमाण्डौंः तेस्रो चाइना नेपाल मिडिया समिट तथा जनवादी गणतन्त्र चीनको ७५ औँ वार्षिकोत्सव काठमाण्डौंमा सम्पन्न भएको छ। एस् ए टी भी तथा नेपाल चाइना मिडिया फोरमको सह आयोजनामा भएको कार्यक्रममा नेपाल सरकारका सूचना तथा सञ्चार मन्त्री सम्माननीय पृथ्वी सुब्बा गुरुङ, नेपाल स्थित चिनियाँ दूतावासका राजदूत छन् सोङ , नेकपा माओवादी केन्द्रका महासचिव देव गुरुङ, नेपाल स्थित चिनियाँ उद्यमीहरुको संस्थाका अध्यक्ष चु चिङ चुन, नेपाल पर्यटन बोर्डका उपाध्यक्ष राम प्रसाद सापकोटा लगायतको उपस्थिति थियो।
कार्यक्रम एस् ए टी भीको स्थापना पछिको कामको बारे विश्लेषण सहितको भिडियो प्रस्तुत गर्दै सुरु भएको थियो। नेपाल चाइना मिडिया फोरमका अध्यक्ष किशोर श्रेष्ठले नेपाल र चीनको सम्बन्ध पहिल्यै देखि सुन्दर रहँदै आएको र अब नेपाली तथा चिनियाँ सञ्चारमाध्यमले मिलेर यस किसिमको प्राचीन सम्बन्धलाई अझ प्रगाढ बनाउन पहल गर्नु पर्ने भन्नु भयो।
नेपालका लागि चिनियाँ राजदूत महामहिम छन् सोङ्ले आफ्नो मन्तव्य राख्दै नेपाल र चिनको सम्बन्ध सधैँ राम्रो रहेको र चीनले सधैँ नेपाल र नेपालीको समृद्धि चाहेको बताउनु भयो। आफ्नो देशले ७५औँ स्थापना दिवस मनाइरहँदा धेरै खुट्किलाहरू चढेर आएकाले, गरिब देशको सुचीबाट धनी देशको सुचीमा पुग्दाका सङ्घर्ष र कथाहरूबाट पाठ सिक्न सकिने बताउनु भयो। साथै नेपालको अर्थतन्त्रमा सहयोग पुर्याउन नेपालबाट उत्पादित वस्तुहरूलाई कर नलाग्ने व्यवस्था गरेको जानकारी पनि गर्नु भयो।
विभिन्न सांस्कृतिक प्रस्तुतिहरूले रोमाञ्चकता थपेको कार्यक्रममा बोल्दै कार्यक्रमका प्रमुख अतिथि पृथ्वी सुब्बा गुरुङले नेपाल र चीन बिचको लामो सुमधुर सम्बन्ध रहँदै आएको सम्झँदै जनवादी गणतन्त्र चीनको ७५ औँ वार्षिकोत्सवको शुभकामना व्यक्त गर्नु भयो। प्रायः समय पत्रकारिता क्षेत्रको विकास र ती क्षेत्रले देश तथा छिमेकमा ल्याउने सकारात्मक परिवर्तनको व्याख्या गर्दै नेपाललाई चीन सरकारले पूर्वाधार विकासमा पनि महत्त्वपूर्ण सहयोग गर्दै आएको र यस सहयोगमा बढोत्तरीको आशा राखेको बताउनु भयो।
कार्यक्रममा रिलायन्स स्कुलका छात्रछात्राले आइ लभ यु चाइना बोलको चिनिया गीत गाउनुका साथै विभिन्न कविहरूले कविता पनि प्रस्तुत गरेका थिए।
एस् ए टी भी का अध्यक्ष तथा आयोजक हौ च्री होङ्ले यस सुमधुर समयमा भएको कार्यक्रममा सहभागी भएर कार्यक्रमको शोभा बढाइदिनु भएकोमा अतिथिहरूलाई धन्यवाद अर्पण गर्दै एस् ए टी भी ले आगामी दिनमा पनि नेपाल र चीन सम्बन्ध सुधार तथा अपनत्व बढाउन यी र यस्ता कार्यक्रमहरू गरिराख्ने जनाउनु भयो।
