काठमाडौं । काठमाडौं महानगरपालिकाका प्रमुख बालेन शाहले नेकपा एमालेका अध्यक्ष केपी शर्मा ओलीलाई सुकुम्बासीमाथि भोटको राजनीति नगर्न आग्रह गरेका छन् ।
शनिबार साँझ सामाजिक संजालमा अविरलवर्षापछि डुबानमा परेका सुकुम्बासी वस्तीका तस्वीर शेयर गर्दे मेयर बालेनले यस्तो आग्रह गरेका हुन् ।
आज काठमाडौंमा केही घण्टा पानी पर्दा खोला छेउ बस्ने धेरै डुबानमा परे । खोला वस्तीमा पसेको हैन, खोलाले आफ्नो बाटो खोजेको हो । आज एकदिन पानी पर्दा त यस्तो हालत छ, केही दिन लगातार पानी पर्दा के हालत हुने हो’ उनले लेखेका छन, ‘ठुलो दुर्घटना कुन दिन आउँछ भनेर कुर्दै बस्ने हो र हामी ? उहाँहरूको जीवनसँग खेलवाड गरेर भोटको राजनीति यसरी नै सधैँ गरिरहने हो ? उहाँहरूलाई उचित ठाउँमा लगेर व्यवस्थापन गर्नेतर्फ सोच्ने कि ।’
यस्तै उनले प्रश्न गरेका छन्, ‘उहाँहरुलाई जसरी ३० वर्ष झुलाइसक्नुभयो, अझै अर्को ३० वर्ष पनि झुलाउने सोच बनाउनु भएको छ ?’
काठमाडौंमा लगभग २ हजार परिवार खोला छेउमा बस्ने गरेको भन्दै बालेनले गिरीवन्धुको जग्गा प्रकरण देखाएर कडा व्यङ्गय पनि गरेका छन् ।
उनी लेख्छन्, ‘तपाईले पचाउन खोज्नु भएको गिरिबन्धु’मा यस्ता १५ हजार परिवार व्यवस्थापन हुन सक्छ । अब त प्रधानमन्त्री नि बन्दै हुनुहुन्छ रे, त्यो पनि दुई तिहाई बहुमतसहित । अब यो समस्याको समाधान गर्नु हुनेछ भन्ने आशा लिएको छु ।’
