काठमाडौं । राष्ट्रिय स्वतन्त्रपार्टीले कार्यवाहक महामन्त्रीको जिम्मा सहमहामन्त्री कबीन्द्र बुर्लाकोटीलाई दिएको छ ।
महामन्त्री मुकुल ढकाललाई निलम्बन गर्दै पार्टीले बुर्लाकोटीलाई कार्यवाहकको जिम्मेवारी सुम्पिएको हो ।
हिजो अबेरसम्म बसेको पार्टीको केन्द्रीय समितिको बैठकले अनुशासन र विधिको पालना नगरेको भन्दै ढकाललाई ७ दिन निलम्बन गर्ने निर्णय गरेको हो ।
केन्द्रीय समितिले ढकालका विषयमा थप छानविन गर्न पार्टीको अनुशासन विभागलाई ७ दिनको समय दिएको छ । विभागले बुझाउने प्रतिवेदनका आधारमा ढकालको भविष्य निर्धारण हुने छ ।
आयोगले उनलाई कारबाही गर्न नपर्ने प्रतिवेदन बुझाए उनी पदमा फर्किन पनि सक्ने उपाध्यक्ष स्वर्णिम वाग्लेले बताए ।
ढकालले सम्हाल्दै आएको प्रवक्ताको जिम्मेवारी मनिष झालाई दिइएको छ ।
पार्टी हित विपरित ढकालले अभिव्यक्ति दिदै आएकाले उनीमाथि अनुशासनको कारबाही हुनुपर्ने केन्द्रीय समितिले ठहर गरेको छ ।
