माघ २३ गते । सर्लाहीको चुरेभेगका स्थानीय अझै कुवाको पानीमा निर्भर रहेका छन् । यहाँको चुरे पाखाका विकट बस्तीमा बसोबास गर्ने स्थानीयलाई खानेपानीका लागि कुवाबाहेक अन्य विकल्प छैन । स्थानीयले खोला किनार तथा पाखापखेरामा रसाएको पानी पिउँदै आएका छन् ।
चुरेभेगसँग जोडिएको ईश्वरपुर नगरपालिकाको वडा नं. १२, लालबन्दी नगरपालिकाको वडा नं. १२, १३, १४ र १५ हरिवन नगरपालिकाको वडा नं. १ र बागमती नगरपालिकाको वडा नं. १ का स्थानीय अहिले पनि कुवाको पानीमा निर्भर रहेका छन् । अहिलेसम्म कुवा र पाखापखेरामा पानी रसाइरहे पनि अब सुक्खा बढ्दै गएर वनमा डढेलो लाग्न थालेपछि त्यही कुवा पनि सुकेर खानेपानीको अभाव हुने स्थानीयलाई चिन्ता परेको छ ।
लालबन्दी नगरपालिका–१५, कालिन्जोर खोला दोभानका सन्तलाल वाइबाले चुरेभेगमा बस्नेले पुस्तौँपुस्ता कुवाको पानी खाएर प्यास मेट्दै आएको बताउनुभयो । कतिपय बेला कुवाको पानी पशुचौपायाले पनि खाइदिने गरेको वाइबाको भनाइ छ । उहाँले भन्नुभयो, “यहाँ पानीका धारा छैनन्, कुवाको पानी खाएरै प्यास मेट्ने हो । कहिलेकाहीँ त चरिचरनमा छाडिएका वस्तुभाउले त्यही कुवाको पानी पनि खाइदिन्छन् ।” अन्य विकल्प नभएका कारण हामीले पिउने गरेका छौँ ।
दुषित पानी पिउँदा चुरेको विकट गाउँका बासिन्दामा बेलाबेलामा झाडापखालासहित अन्य पानीजन्य सङ्व्रmमण देखा पर्ने गरेको छ । हिउँदका चार महिना जति कुवासमेत सुक्दा पिउने पानीको धेरै नै समस्या हुने चुरेभेगका स्थानीयको गुनासो छ । पालिकाले केही बस्तीमा खानेपानीको धारा पु-याए पनि टाढा टाढा रहेका सबै घरधुरीमा खानेपानीको पहुँच पुग्न सकेको छैन । लालबन्दी नगरपालिका–१४, नारायण खोलाका वडाध्यक्ष छेनामसिंह घिसिङले करिब आठ सय घरधुरी रहेको आफ्नो वडामा सबै जसोले कुवाको पानी नै पिउने गरेको जानकारी दिनुभयो । “हामीले भर्खरै मात्र मुहानबाट पाइप जोडेर ३० घरमा खानेपानीको धारा झारेका छौँ, त्योबाहेक त अन्य सबै घरधुरीले कुवा र पाखाको जरुवा पानी पिउने हो,” वडाध्यक्ष घिसिङले भन्नुभयो, “चुरेको विकट गाउँमा खानेपानीको अन्य विकल्प नै छैन ।” वडाध्यक्ष घिसिङले घरहरू टाढा टाढा छरिएर रहेका र भूगोल पनि असाध्यै ठुलो रहेकाले चुरेभेगका सबै घरधुरीमा खानेपानीको धारा पु¥याउन स्थानीय स्तरबाट असम्भव जस्तै रहेको बताउनुभयो ।
