काठमाडौँ — भक्तपुरको ब्रम्हपर चोक, नासमना टोलबाट ३० वर्षअघि चोरिएको चर्तुमुखी शिवलिंग अस्ट्रियाको भियनास्थित एक लिलाम गृहमा बिक्री भएको पाइएको छ ।
चोरिएका/हराएका सम्पदाको खोजबिन र घरफिर्तीमा जुटेको अभियान 'लस्ट आर्टस् अफ नेपाल'का अनुसार भियनाको ग्यालरी ज्याके लिलाम गृहमा भक्तपुरको पुरातात्विक शिवलिंग फेला परेको हो । भियनासम्म के कसरी र कुन माध्यमबाट पुगेको हो नखुलाइए पनि यो सम्पदा २०२२ मार्च ११ मा बिक्री भएको पाइएको छ ।
सत्रौं शताब्दीको सम्पदा प्रमाणित गरिएको यो शिवलिंगको सन् १९९३ तिर स्थानीय बासिन्दा नारायणप्रसाद झाले लिएको मूल तस्बिरका आधारमा तुलनात्मक अध्ययन गर्दा उत्पत्तिको पहिचान खुलेको हो ।
