काठमाडौं, पुस ८। कोरिया सरकारले नेपालाई ४२ वटा उन्नत जातका गाई तथा साँढे अनुदान दिएको छ। नेपाल सरकारलाई निःशुल्क हस्तातरण गर्ने गरी विहिबार जहाजमार्फत कोरेली बाच्छी र साँढे काठमाडौं ल्याउन थालिएको छ।
२० वटा होलेस्टेन साँढे (बाच्छा) र १०१ वटा होलेस्टेन गाई काठमाडौंमा ल्याउने तयारी रहेको कृषि तथा पशुपन्छी विकास मन्त्रालयले जनाएको छ। बिहीबार पहिलो चरणमा नेपाल आइपुगेका गाई, सााढे र ३४ लिटर जमेको वीर्य नेपालका लागि दक्षिण कोरियाका राजदूत पार्क सोङ्ग सुले कृषि तथा पशुपन्छी विकास मन्त्रालयका पशुपन्छी विकासतर्फका सचिव डा. दीपककुमार खराललाइ हस्तान्तरण गरेको मन्त्रालयले जनाएको छ।
ती गाई र साँढेलाई क्यारेन्टाइनका लागि नेपाल कृषि अनुसन्धान परिषद (नार्क)मा राखिने कृषि तथा पशुपन्छी विकास मन्त्रालयका प्रवक्ता प्रकाश कुमार सञ्जेलले बताए। ती गाईहरु केही सरकारलाई र धेरैजसो किसानलाई वितरण गर्ने योजना रहेको उनले बताए। सिन्धुलीका किसानले कमलामाई नगरपालिकाको सहयोगमा यी गाईका लागि गोठ तयार गरिसकेको उनले बताए। नेपालमा दूधको उत्पादन बढाउन र उन्नत नश्लका गाईको संख्या विस्तार गर्न कोरियाबाट सहयोग प्राप्त भएको हो। उनले भने, ‘गाई र साँढे ल्याउँदा लागेको करिब साढे १७ करोड रूपैयाँ खर्च सबै हेफरले बेहोर्नेछ।’
