एस् ए टी भी २९ असार, काठमाडौँः नेपाली सेनाका प्रधानसेनापति अशोकराज सिग्देलले पञ्चशीलका सिद्धान्तमा आधारित नेपाल–चीन सम्बन्धलाई अतुलनीय भन्दै नेपाली सेना र चिनियाँ जनमुक्ति सेनाबीचको सम्बन्ध सुमधुर रहेको बताएका छन्। जनमुक्ति सेनाको ९८ औँ वार्षिकोत्सवका अवसरमा चिनियाँ दूतावासद्वारा आयोजित स्वागत समारोहमा बोल्दै उनले कोभिड महामारी र भूकम्पपछिको पुनर्निर्माणमा जनमुक्ति सेनाले गरेको सहयोगप्रति आभार प्रकट गरे। सिग्देलले विपद् व्यवस्थापन, उद्धार, संयुक्त सैन्य अभ्यास तथा साझा चासोका विषयमा दुई सेनाबीच सधैं सहकार्य हुँदै आएको पनि बताए।
समारोहमा चीनका राजदूत छन सोङले जनमुक्ति सेनाको शान्ति, सहयोग र साझा भविष्य निर्माणमा केन्द्रित भूमिकाको चर्चा गर्दै नेपाल–चीन मैत्री सम्बन्धलाई अझ प्रगाढ बनाउने प्रतिबद्धता दोहोर्याए। चीन र नेपालबीच कूटनीतिक सम्बन्ध स्थापनाको ७० औं वर्ष पुगेको सन्दर्भमा दुवै देशबीच सहकार्य र साझेदारीका कार्यक्रम कार्यान्वयन भइरहेका पनि उनले उल्लेख गरे।
सैनिक सहचारी ल्यु कोछङले जनमुक्ति सेनाले संयुक्त राष्ट्रसंघको आह्वानमा द्वन्द्वग्रस्त मुलुकहरूमा सुरक्षा र मानवीय सहायतामा सक्रिय भूमिका खेलिरहेको जानकारी दिए। कार्यक्रममा चिनियाँ सैन्य इतिहास तथा जन सेनाको बारेमा तस्वीर पनि प्रदर्शन गरिएका थिए।
