सहकारी संस्था बचत दुरुपयोग सम्बन्धमा संसदीय छानबिन समितिले छलफलका लागि सहकारीपीडितलाई बोलाएको छ । सिंहदरबारमा बुधबार बिहान ११ बजे बस्ने बैठकमा समितिको कार्यक्षेत्रभित्र रहेको २९ सहित अन्य सहकारीमा जोडिएका पीडितबाट पनि प्रतिनिधिमूलक ढंगबाट छलफलका लागि आमन्त्रण गरिएको सभापति सूर्य थापाले जानकारी दिए ।
पीडितसँग छलफल गरेर सहकारीमा देखिएका समस्याबारे जानकारी लिइने उनको भनाइ छ । समितिले मंगलबार सहकारी समस्याबारे ०७२ पछिका सहकारी विभागका रजिस्ट्रारहरूलाई बोलाएर छलफल गरेको थियो ।
छलफलमा पूर्वरजिस्ट्रारहरूले ०७४ पछि नियमनको काम शून्य भएको र नियमनको काम अत्यन्त कमजोर भएका कारण समस्या विकराल भएको निष्कर्ष सुनाएका थिए । नियमनका लागि विभागलाई कानुनी रूपमा धेरै अधिकार नभएको र संरचनागत व्यवस्थापनअनुरूप काम नहुँदा पनि समस्या आएको उनीहरूले सुनाएको थापाले बताए ।
