एस् ए टी भी भाद्र ९, २०८२ काठमाडौँ: नेपाल पर्यटन विकास व्यवसायी संघ (NTDEA) को आयोजनामा, हनुमानढोका दरबार संग्रहालयको सहआयोजनामा, तथा नेपाल पर्यटन बोर्ड (NTB) को प्रवर्द्धनमा आज हनुमानढोका दरबार क्षेत्रस्थित दाखा चोकमा सांस्कृतिक सम्पदा पदयात्रा (Cultural Heritage Excursion) भव्य रूपमा सम्पन्न भएको छ।
कार्यक्रमको अध्यक्षता NTDEA का अध्यक्ष अच्युत सिग्देलले गर्नुभयो। पदयात्राको मुख्य आकर्षणका रूपमा प्रा. डा. सोमप्रसाद खतिवडाद्वारा हनुमानढोका दरबार क्षेत्रका ऐतिहासिक दरबार, चोक, मन्दिर, मूर्ति, कलात्मक संरचना र यहाँको मौलिक सम्पदाबारे गाइडेड टुर संचालन गरिएको थियो। यस टुरमा सहभागीहरूले करिब १ घण्टा ३० मिनेटमा यस क्षेत्रका महत्वपूर्ण सम्पदाको ऐतिहासिक, सांस्कृतिक र कलात्मक पक्षबारे गहिरो जानकारी प्राप्त गरेका थिए।
अध्यक्ष अच्युत सिग्देलले कार्यक्रममा बोल्दै, “यस पदयात्राको उद्देश्य पर्यटन उद्यमी, गाइड, विद्यार्थी, शिक्षक तथा सरोकारवाला निकायबीच सम्पदाबारे गहिरो ज्ञान आदानप्रदान गर्नु हो,” भन्नुभयो। NTDEA ले विगतदेखि नै सांस्कृतिक पर्यटन प्रवर्द्धन, सम्पदाको सही व्याख्या र पर्यटन उद्यमीहरूको क्षमता विकासलाई प्राथमिकतामा राख्दै आएको छ। आगामी दिनमा पनि यस्ता कार्यक्रमलाई अझ निरन्तरता दिने योजना रहेको उहाँले स्पष्ट पार्नुभयो।
हनुमानढोका दरबार संग्रहालयका प्रमुख काजिमान प्याकुरेलले सम्पदाको संरक्षण र प्रवर्द्धनबारे महत्वपूर्ण जानकारी प्रस्तुत गर्नुभयो।“हामी निकट भविष्यमा संग्रहालयको समय विस्तार गर्ने तयारीमा छौं,” प्याकुरेलले भन्नुभयो। “यदि पर्यटन उद्यमीहरूले यहाँका सम्पदालाई सही तरिकाले बुझेर पर्यटकहरूलाई व्याख्या गर्ने हो भने, यसले नेपालको सांस्कृतिक पर्यटन प्रवर्द्धनमा महत्त्वपूर्ण योगदान पुर्याउनेछ,” उहाँले भन्नुभयो।
नेपाल पर्यटन बोर्ड (NTB) का कार्यवाहक निर्देशक सुनिल शर्माले नेपालको सांस्कृतिक सम्पदा, कला, वास्तुकला र धर्मबारे स्टोरीटेलिङ प्रविधि तथा पर्यटन मानव पूँजीको विकास आवश्यक रहेको बताउनुभयो।“नेपालमा गाइड र पर्यटन उद्यमीहरूले हाम्रो सम्पदा, कला, वास्तुकला र धर्मबारे गहिरो अध्ययन गर्नुपर्ने आवश्यकता बढ्दो छ। आवश्यक ज्ञान र स्रोत उपलब्ध भएमा गुणस्तरीय भ्रमण प्याकेज विकास गरेर नेपालको पर्यटन व्यवसायलाई नयाँ उचाइमा लैजान सकिन्छ,” शर्मा भन्नुहुन्छ।उहाँले सांस्कृतिक शिक्षा, कला–वास्तुकला अध्ययन र स्टोरीटेलिङमा लगानी नगरी दीगो पर्यटन प्रवर्द्धन सम्भव छैन भन्नुभयो ।
प्रा. डा. सोमप्रसाद खतिवडाले कार्यक्रममा सहभागीलाई काठमाडौँ उपत्यकाको युनेस्को विश्व सम्पदा सूचीबारे विस्तृत जानकारी दिनुभयो। उहाँका अनुसार, काठमाडौँ उपत्यका स्वयं एक UNESCO World Heritage Site हो, जसअन्तर्गत सातवटा मोनुमेन्ट जोन रहेका छन्। “गाइड र पर्यटन उद्यमीहरूले यी सम्पदाको सही अर्थ बुझेर आफ्ना भ्रमण कार्यक्रमहरूमा समावेश गर्नुपर्छ। गलत अवधारणा दिनु हुँदैन, बरु पर्यटकहरूलाई इतिहास, कला र वास्तुकलासँग जोडेर अनुभवात्मक रूपमा बुझाउनुपर्छ,” खतिवडाले भन्नुभयो।
कार्यक्रममा विभिन्न पर्यटन क्षेत्रका ४८ जना सरोकारवालाहरूको सक्रिय सहभागिता रहेको थियो। सहभागी संघसंस्थाहरूमा TURGAN, NTVA, SOTTO Nepal, Sherpa Tourism Entrepreneurs Association, South Asia Network TV, 24hr Tourism Support Nepal, पर्यटन शिक्षक संघ, NATHM, Bhaktapur Tourism Development Committee, Patan Museum, Merolagani लगायतका प्रतिनिधिहरूको उल्लेखनीय उपस्थिति रहेको थियो।
कार्यक्रमको अन्त्यमा सहभागीहरूलाई सहभागिता प्रमाणपत्र प्रदान गरिएको थियो। साथै प्रा. डा. सोमप्रसाद खतिवडा, मणि सुवेदी, नेपाल पर्यटन बोर्ड, संग्रहालय प्रमुख काजिमान प्याकुरेल र बैकुण्ठ महतलाई Token of Love प्रदान गरी सम्मान गरिएको थियो।
NTDEA ले यस्ता कार्यक्रमहरूलाई निरन्तरता दिने जनाएको छ। संस्थाले सम्पदाबारे सचेतना फैलाउने, पर्यटन उत्पादनको गुणस्तर वृद्धि गर्ने र स्थानीय स्तरमा आर्थिक अवसर सिर्जना गर्ने दीर्घकालीन लक्ष्य राखेको छ।यस कार्यक्रमको समन्वयक उपदेश शम्शेर कुँवर हुनुहुन्थ्यो, जसलाई NTDEA कार्यसमितिले पूर्ण सहयोग प्रदान गरेको थियो।
