एस ए टि भी, चितवन भदाै ४ (रमेश श्रेष्ठ) । चितवनको भरतपुरस्थित बीपी कोइराला मेमोरियल क्यान्सर अस्पतालमा चीन सरकारको सहयोगमा बोनम्यारो प्रत्यारोपण केन्द्र बन्ने भएको छ।
अस्पतालको भौतिक संरचना तथा प्रविधिको अध्ययनको निम्ती चीनबाट सात सदस्यीय टोली ५ दिनको लागी बीपी कोइराला मेमोरियल क्यान्सर अस्पताल आएको हो । अस्पतालका कार्यकारी निर्देशक डाक्टर शिवजी पौडेलका अनुसार अस्पतालमा बोनम्यारो प्रत्यारोपणका लागि भवन, आवश्यक उपकरण र जनशक्ति व्यवस्थापन सम्बन्धी चीन सरकारसँग सम्झौता भइ सकेको छ ।
मंगलबार भएको बोनम्यारो प्रत्यारोपण शैक्षिक आदानप्रदान कार्यक्रममा बोल्दै नेपालस्थित चिनियाँ दूतावासका काउन्सिलर वाङ सिनले बोनम्यारो प्रत्यारोपण (BMT) परियोजना, दुई देशको चिकित्सा र स्वास्थ्य सहयोगमा एक प्रमुख कोसेढुङ्गाको रूपमा रहेको बताए। यो परियोजना बेल्ट एण्ड रोड इनिसिएटिभ अन्तर्गत "स्वास्थ्य सिल्क रोड" को जीवन्त कार्यान्वयन मात्र नभइ, एक कल्याणकारी परियोजना पनि हो जसले दुवै देशका जनतालाई फाइदा पुर्याउनेछ।
विपी कोइराला मेमोरियल क्यान्सर अस्पताल सञ्चालक समितिको अध्यक्ष डा. विजयराज न्यौपानेले बोनम्यारो प्रत्यारोपण केन्द्र स्थापनामा सहयोग गरेकोमा चीन सरकार र चिनियाँ चिकित्सा टोलीलाई हार्दिक धन्यवाद व्यक्त गरे। यो केन्द्रको स्थापना दुई देशबीचको मित्रताको कोशेढुङ्गा हो, जसले विदेशमा गइ खर्चीलो उपचार लिन नसक्ने बिरामीहरूलाई नयाँ जीवन प्रदान गर्ने छ, उनले भने।
विपी कोइराला मेमोरियल क्यान्सर अस्पताल, सन् १९९८ मा जनवादी गणतन्त्र चीन सरकारको सहयोगमा स्थापना भएको हो। चिनियाँ सरकारसँगको सम्झौता अनुसार चीन सरकारले हरेक वर्ष अस्पताललाई निरन्तर चिनियाँ चिकित्सा टोली पठाइ रहेको छ।
