एस् ए टी भी ०५ वैशाख, काठमाडौँः नारायणगढ-बुटवल सडक खण्डको दाउन्ने क्षेत्रमा वर्षाका कारण सडक चिप्लो भएर २१ घन्टादेखि यातायात ठप्प बनेको छ। पूर्वी नवलपरासीको बर्दघाट र दुम्कीबासको बीचमा पर्ने १४ किलोमिटर सडक खण्ड अवरुद्ध बनेको हो ।
बिहीबार बिहान पानी परेपछि दाउन्नेको घ्यू खोला नजिक सडक चिप्लो भएका कारण आउजाउ गर्न सकेका छैनन् । जसका कारण सडक ठप्प बनेको छ भने हजारौँ यात्रु अलपत्र परेका छन् ।
बिहीबार बिहान ११ बजेबाट सडक ठप्प बनेको र अहिलेसम्म पनि यातायात अवरुद्ध नै रहेको जिल्ला प्रहरी प्रमुख यादव ढकालले जानकारी दिए। उनका अनुसार दुम्कीबास नजिकै घ्यू खोलामा राजमार्ग चिप्लो भएका कारण सडकमा जाम भएको हो । राजमार्ग फराकिलो पार्ने क्रममा भत्काइएको सडकमा ३ फिट अग्लो धुलो छ । पानी परेपछि धुलाम्मे रहेको हिलाम्मे भएको छ ।
बिहीबार भौतिक पूर्वाधार तथा यातायात मन्त्री देवेन्द्र दाहाल पनि चार घन्टासम्म जाममा परेका छन् । मन्त्री दाहाललाई प्रहरीले उद्धार गरेर राति ८ बजे चितवन पुर्याएको थियो । बुटवलबाट नारायणगढ जाँदै गरेका मन्त्री दाहाल दाउन्नेमा जाममा फसेका थिए ।
