धनगढी, चैत १४ गते । हात्तीपाइले रोगविरुद्धको आमऔषधि सेवन अभियानले कैलालीमा यस वर्ष लक्ष्य हासिल गरेको छ। कैलालीमा १० वर्षसम्म यो अभियान व्यर्थ भएको थियो। २० दिनसम्म अभियान सञ्चालन गरेर लक्ष्य पूरा गरिएको हो।
जिल्ला स्वास्थ्य कार्यालय प्रमुख लालबहादुर धामीका अनुसार यस पटक ८० प्रतिशतलाई आमऔषधि खुवाउने लक्ष्य रहेको थियो तर लक्ष्यभन्दा बढीलाई हात्तीपाइले रोगविरुद्धको औषधि खुवाउन सफलता प्राप्त भएको छ। उहाँले भन्नुभयो, “तोकिएको लक्ष्य हामी ११औँ अभियानमा हासिल गर्न सफल भएका छौँ। जिल्लाभरि लक्ष्यभन्दा बढीले आमऔषधि खाएका छन्।”
जिल्ला स्वास्थ्य कार्यालयका अनुसार नौ लाख २६ हजारभन्दा बढी जनसङ्ख्या रहेको यो जिल्लामा यस वर्ष सात लाख ५९ हजार ६११ जनाले हात्तीपाइले रोगविरुद्धको आमऔषधि खाएका छन्। जुन ८१.९५ प्रतिशत प्रगति रहेको सो कार्यालयले जनाएको छ। यसअघि १० वर्षसम्म सञ्चालित आमऔषधि खुवाउने अभियानमा लक्ष्य पूरा भएको थिएन। लक्ष्य पूरा नभएका कारण वर्षंैपिच्छे हात्तीपाइले रोगविरुद्धको आमऔषधि खुवाउनु परेको थियो। ११औँ पटकको अभियानमा लक्ष्यभन्दा बढीले हात्तीपाइले रोगविरुद्धको औषधि खाएकाले सम्भवतः हात्तीपाइले रोग निवारण हुने अपेक्षा प्रमुख धामीको छ।
उहाँले भन्नुभयो, “यसका लागि सर्भे हुन्छ। सर्भेको नतिजा पास आयो भने हात्तीपाइले निवारण हुनेछ। अर्को वर्ष औषधि खुवाउनु पर्दैन।” स्वास्थ्य सेवा विभागको इपिडिमियोलोजी तथा रोग नियन्त्रण महाशाखाले अभियान सफल भए/नभएको टुङ्गो लगाउन सर्वेक्षण गर्ने जनाइएको छ। जिल्ला स्वास्थ्य कार्यालयका अनुसार मोहन्याल गाउँपालिकामा १९ हजार ७४२ (९०.५२ प्रतिशत), चुरे गाउँपालिकामा १७ हजार ७८८ (८१.१२ प्रतिशत), गोदावरी नगरपालिकामा ८३ हजार ८८६ (८१.८२ प्रतिशत) जनाले हात्तीपाइले रोगविरुद्धको औषधि खाएका छन्। गौरीगङ्गा नगरपालिकामा ५५ हजार ४०८ (८३.५४ प्रतिशत), घोडाघोडी नगरपालिकामा ६७ हजार ५५२ (७७.१० प्रतिशत), बर्दगोरिया गाउँपालिकामा ३४ हजार १०९ (८८.७४ प्रतिशत) जनाले आमऔषधि खाएका छन्।
लम्कीचुहा नगरपालिकामा ७५ हजार १२ (८०.९३ प्रतिशत), जानकी गाउँपालिकामा ३७ हजार ३९२ (७३.७४ प्रतिशत), जोशीपुर गाउँपालिकामा ३१ हजार ६२० (८३.६७ प्रतिशत) जनाले हात्तीपाइले रोगविरुद्धको औषधि खाएका छन्। टीकापुर नगरपालिकामा ८२ हजार २२ (८९.५८ प्रतिशत), भजनी नगरपालिकामा ४४ हजार ५२० (८१.२७ प्रतिशत), कैलारी गाउँपालिकामा ४१ हजार १४१ (८०.२६ प्रतिशत) जनाले आमऔषधि खाएका छन्। सबैभन्दा बढी जनसङ्ख्या रहेको धनगढी उपमहानगरपालिकामा एक लाख ६९ हजार ४४७ (८०.८९ प्रतिशत) जनाले हात्तीपाइले रोगविरुद्धको आमऔषधि खाएको जिल्ला स्वास्थ्य कार्यालयले जनाएको छ।
सो कार्यालयको तथ्याङ्कअनुसार सबैभन्दा राम्रो ‘कभरेज’ मोहन्याल गाउँपालिकामा भएको छ भने न्यून कभरेज जानकी गाउँपालिमा छ। विगतमा जान्नेबुझ्ने, पढेलेखेका र धनी वर्गका मानिसले आमऔषधि नखाइदिँदा अभियान सार्थक बन्न सकेको थिएन। यस पटक स्थानीय तह, प्रदेश सरकार, सुरक्षाकर्मी सबैको सहयोगमा लक्ष्य हासिल गरेको प्रमुख धामीले बताउनुभयो। “यस पटक हात्तीपाइले रोग निवारण हुने आस गरेका छौँ,” उहाँले भन्नुभयो। कैलालीमा दुर्ई जनासम्म हात्तीपाइलेको रोगी रहेको स्वास्थ्य कार्यालयले जनाएको छ।
