काठमाडौँ, जेठ १७ गते । लगातार चार दिनको सार्वजनिक बिदाका कारण मुस्ताङमा घुम्न आउने स्वदेशी पर्यटकको चाप बढेको छ । बेनी–जोमसोम–कोरला सडकमार्ग हुँदै एकै दिन झण्डै आठ हजार नेपाली पर्यटक मुस्ताङ प्रवेश गरेका छन् ।
बिहीबारदेखि आगामी आइतबारसम्मको बिदा मनाउन बिहीबार मात्रै सात हजार ८ सय २७ जना नेपाली पर्यटक सडकमार्ग हुँदै मुस्ताङ पुगेको जिल्ला प्रहरी कार्यालय मुस्ताङले जनाएको छ ।
सीमा प्रहरी चौकी घाँसाबाट चार हजार सात सय २३ जना पुरुष र तीन हजार एक सय चार जना महिला विभिन्न सवारीसाधनमार्फत मुस्ताङ प्रवेश गरेको जिल्ला प्रहरी कार्यालय मुस्ताङका सूचना अधिकारी सन्तोष बस्यालले जानकारी दिनुभयो ।
प्रहरी निरीक्षक बस्यालले भन्नुभयो, “बिदाको समयमा मुस्ताङमा घुम्न आउनेको अत्यधिक भिड लागेको छ । लामो बिदामा पर्यटकको चाप निकै बढ्ने गर्छ ।”
स्वदेशी पर्यटकको आगमनसँगै मुस्ताङका साना–ठूला होटल भरिभराउ भएका छन् । बिहीबार, शुक्रबार र शनिबार अझ धेरै पर्यटक भित्रिने अनुमान गर्दै प्रहरीले सडकखण्डमा गस्ती बढाउनुका साथै आवश्यक सावधानी अपनाउन आग्रह गरेको छ ।
मुस्ताङ भित्रिने अधिकांश स्वदेशी पर्यटक घाँसादेखि चीनको सीमा क्षेत्र कोरलासम्म पुग्ने गरेका छन् । माथिल्लो क्षेत्रमा जाने पर्यटकलाई लेक लाग्ने समस्या हुन सक्ने भएकाले सचेतनामूलक अभियानसमेत सञ्चालन गरिएको प्रहरीले जनाएको छ ।
मुस्ताङ उद्योग वाणिज्य सङ्घका अध्यक्ष राजु लालचनका अनुसार स्वदेशी पर्यटकको बसाइ सामान्यतया दुईदेखि चार दिनसम्म हुने गरेको छ ।
अध्यक्ष लालचनले भन्नुभयो, “सार्वजनिक बिदा थपिएपछि घुम्न आउनेको चहलपहल ह्वात्तै बढेको छ । प्रतिकूल मौसमका कारण पर्यटकले केही सास्ती पनि खेप्नुपरेको छ ।”
बेनी–जोमसोम–कोरला सडकअन्तर्गत म्याग्दी खण्डमा बाढीपहिरोका कारण एकतर्फी सवारी सञ्चालन हुँदा लामो समयसम्म ट्राफिक जाम हुने गरेको छ ।
प्राचीन गुफा, बस्तीभन्दा टाढा रहेका मानवनिर्मित गुफा, गुम्बा, उजाड पहाड, मुस्ताङी कला–संस्कृति, हावापानी तथा आकर्षक पर्यटकीय गन्तव्यहरू मुस्ताङका प्रमुख आकर्षण मानिन्छन् ।
