काठमाडौँ, वैशाख ९ गते । नेपालस्थित चिनियाँ दूतावासको आयोजनामा “वसन्तको धुन · संगीतसँगै भित्री मङ्गोलिया यात्रा” शीर्षकको विशेष सांस्कृतिक कार्यक्रम मंगलवार काठमाडौंमा भव्य रूपमा सम्पन्न भएको छ। कार्यक्रममा नेपाल–चीनबीचको ऐतिहासिक सम्बन्ध, सांस्कृतिक आदान–प्रदान तथा भविष्यका सहकार्यका सम्भावनाहरूलाई केन्द्रमा राखिएको थियो।
कार्यक्रमलाई सम्बोधन गर्दै राष्ट्रिय सभाका पूर्व अध्यक्ष गणेश तिमिल्सिनाले नेपाल–चीन सम्बन्ध पौराणिक कालदेखि नै गहिरो र मैत्रीपूर्ण रहेको उल्लेख गर्दै दुवै देशबीचको सम्बन्ध हिमालय जस्तै अटल रहेको बताए। उनले नेपाल एक–चीन नीतिप्रति पूर्ण प्रतिबद्ध रहेको र दुई देशबीचको सहकार्यलाई अझ उच्च स्तरमा लैजानुपर्ने आवश्यकता औंल्याए।
त्यस्तै, नेपालका लागि चीनका राजदूत चाङ माओमिङले नेपाल–चीन सम्बन्धलाई “समुद्र र हिमालजस्तै स्थायी मित्रता” का रूपमा वर्णन गर्दै “एक पेटी एक मार्ग” पहल, व्यापार, पूर्वाधार तथा जनस्तरको सहकार्यले सम्बन्धलाई नयाँ उचाइमा पुर्याएको बताए।
कार्यक्रममा भित्री मङ्गोलिया संस्कृति तथा पर्यटन विभागका उपनिर्देशक सुन कोमिङले भित्री मङ्गोलियाको विशाल सांस्कृतिक सम्पदा, प्राकृतिक सौन्दर्य र आर्थिक विकासबारे चर्चा गर्दै नेपालसँग सांस्कृतिक तथा पर्यटन सहकार्यलाई अझ विस्तार गर्ने इच्छा व्यक्त गरे।
आयोजकका अनुसार भित्री मङ्गोलियाबाट आएका कलाकारहरूले प्रस्तुत गरेका परम्परागत गीत, नृत्य तथा नेपाली गीत “रेशम फिरिरी” को विशेष प्रस्तुतिले कार्यक्रमलाई झनै आकर्षक बनाएको थियो।
कार्यक्रममा वक्ताहरूले नेपाल–चीन सम्बन्ध सन् १९५५ मा औपचारिक कूटनीतिक सम्बन्ध स्थापना भएदेखि निरन्तर मजबुत हुँदै आएको उल्लेख गर्दै उच्चस्तरीय भ्रमण, व्यापार, शिक्षा, संस्कृति तथा जनस्तरको सम्बन्धले दुई देशलाई अझ नजिक बनाएको धारणा व्यक्त गरे।
कार्यक्रमको अन्त्यमा नेपाल–चीन मित्रता सधैं अमर रहोस् भन्ने शुभकामना व्यक्त गर्दै कार्यक्रम सफलतापूर्वक सम्पन्न भएको घोषणा गरिएको थियो।
