काठमाडौँ महानगरपालिकाले साझा यातायातसँगको सहकार्यमा वैशाख १ गतेदेखि दुई वटा रुटमा रात्रिकालीन सार्वजनिक बस सञ्चालन गर्ने भएको छ ।
पहिलो रुट लगनखेलबाट पाटन अस्पताल, प्रसूति गृह, ट्रमा सेन्टर, वीर अस्पताल, त्रिवि शिक्षण अस्पताल र गङ्गालाल हुँदै बूढानीलकण्ठसम्म र दोस्रो रुट थानकोटबाट कलङ्की, त्रिपुरेश्वर, माइतीघर, बानेश्वर हुँदै त्रिभुवन अन्तर्राष्ट्रिय विमानस्थलसम्म हुनेछ । यी दुई रुटमा चार वटा विद्युतीय बस सञ्चालन हुनेछन् ।
कार्यवाहक मेयर सुनिता डङ्गोलले बेलुका ८ बजेपछि बस नहुँदा यात्रुले महँगो भाडा तिर्नुपर्ने समस्या समाधान गर्न यो सेवा शुरू गर्न लागिएको बताउनुभयो । सेवालाई आधुनिक, सुरक्षित र दिगो बनाउन साझेदारहरूसँग सहकार्य गर्न महानगर खुला रहेको उहाँको भनाइ छ ।
बस बेलुका ८ बजेदेखि राति ११ बजेसम्म सञ्चालन हुनेछ । हरेक बिसौनीमा २० मिनेटको अन्तरमा बस आउनेछ । बसमा सीसीटीभी क्यामेरा र सुरक्षाका लागि नगर प्रहरी पनि रहनेछन् ।
