काठमाडौँ — अघिल्ला दुई दिन लगातार घटेको नेप्से परिसूचक बुधबार दोहोरो अंकले बढेको छ । सोमबार ८.२४ र मंगलबार २७.६४ अंकले घटेको नेप्से बुधबार १२.१७ अंकले बढेको हो । अघिल्लो दिनको तुलनामा ०.४६ प्रतिशतले बढेपछि समग्र नेप्से २ हजार ६ सय ७ दशमलव ४२ अंकमा पुगेर बन्द भएको छ ।
यस दिन कारोबारमा आएकामध्ये १ सय ४९ कम्पनीको सेयर मूल्य बढ्दा ९० वटाको घट्यो । १२ वटा कम्पनीको सेयर मूल्य स्थिर रह्यो । यसरी सेयरमूल्य बढ्ने कम्पनी घट्नेभन्दा धेरै भएपछि बुधबार समग्र नेप्से दोहोरो अंकले उकालो लागेको हो ।
बुधबार ४२ हजार ८ सय ७९ पटकको कारोबारमा ९२ लाख १८ हजार ८ सय १० कित्ता सेयर किनबेच भए । ती किनबेचमा ४ अर्ब ६८ करोड १९ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम घटेको हो । मंगलबार ५ अर्ब १५ करोड ७ लाख रुपैयाँ बराबरको सेयर कारोबार भएको थियो ।
बुधबार कारोबारमा आएका १३ उपसमूहमध्ये होटल तथा पर्यटन र सामूहिक लगानी कोषबाहेक सबैको परिसूचक बढेपछि समग्र नेप्से दोहोरो अंकले बढेको हो । तर यस दिन होटल तथा पर्यटन उपसमूहको परिसूचक ०.४५ र सामूहिक लगानी कोषको ०.०५ प्रतिशतले घट्यो ।
मंगलबारबाट कारोबारमा आएको माबिलुङ इनर्जीको सेयर मूल्य १० प्रतिशतले बढेर सर्किट ब्रेकरमार्फत कारोबार नियन्त्रण गरिएको छ । बुधबार बजार बन्द हुँदासम्म यो कम्पनीको सेयरमूल्य प्रतिकित्ता ३ सय ८४ रुपैयाँ छ । यस दिन फस्ट माइक्रोफाइनान्स कम्पनीको सेयर मूल्य ७.४८ प्रतिशतले घट्यो । यो कम्पनीको प्रतिकित्ता ८ सय ७८ रुपैयाँमा कारोबार भएको नेप्सेले जनाएको छ ।
बुधबार युनियन हाइड्रोको सेयर सबैभन्दा धेरै रकमको कारोबार भएको छ । यो कम्पनीको ३८ करोड ६१ लाख रुपैयाँ बराबरको सेयर कारोबार भएको छ । बुधबार सेयर बजारको आकार कुल बजार पुँजीकरण करिब २१ अर्ब रुपैयाँले विस्तार भएको छ । मंगलबार ४३ खर्ब ३९ अर्ब रुपैयाँ कायम रहेको कुल बजार पुँजीकरण बुधबार बढेर ४३ खर्ब ६० अर्ब रुपैयाँ पुगेको छ । यससँगै लगानीकर्ताको सम्पत्तिको मूल्य करिब २१ अर्ब रुपैयाँले बढेको विश्लेषण गरिएको छ ।
