एस् ए टी भी २१ चैत्र, काठमाडौँः थाइल्यान्ड भ्रमणमा रहेका प्रधानमन्त्री केपी शर्मा ओलीले शुक्रबार अपराह्न भारतका प्रधानमन्त्री नरेन्द्र मोदीसँग साइडलाइन भेटवार्ता गर्ने भएका छन् । बहुक्षेत्रीय प्राविधिक तथा आर्थिक सहयोगका लागि बंगालको खाडी प्रयास (बिमस्टेक) शिखर सम्मेलनमा भाग लिन ओली थाइल्यान्ड पुगिसकेका छन् ।
भारतीय प्रधानमन्त्री मोदी बिहीबार पुग्ने कार्यक्रम छ । नेपालले ओली र मोदीबीच साइडलाइन भेटका लागि कूटनीतिक प्रयास गरेको थियो । प्रधानमन्त्रीसँग भ्रमण टोलीमा रहेका एक अधिकारीका अनुसार भेट तय भएको छ ।
‘शुक्रबार अपराह्न ४ बजे मोदीजीसँग भेटको समय निर्धारित रहेको छ,’ कान्तिपुरसँग उनले भने । नेपालका तर्फबाट तयार पारिएको ओलीको थाइल्यान्ड भ्रमण कार्यतालिकामा शुक्रबार अपराह्न ४ बजेदेखि २० मिनेटमा मोदीसँग भेटवार्ता हुने उल्लेख छ । त्यसअघि बिहीबार श्रीलंका, भुटान, म्यानमारका सरकार प्रमुखहरूसँग ओलीले द्विपक्षीय भेटवार्ता गर्ने कार्यतालिका छ ।
परराष्ट्र मन्त्रालयका प्रवक्ता तथा सहसचिव कृष्ण ढकालले नेपाल र भारतका प्रधानमन्त्रीबीच शुक्रबार अपराह्न साइडलाइन भेटवार्ताको तयारी रहेको प्रतिक्रिया दिए । मोदी अप्रिल ३ र ४ द्विदिवसीय यात्रामा थाइल्यान्डमा रहनेछन् ।
उनी उताबाट श्रीलंका भ्रमणमा जाने तयारी छ । भारतीय विदेश मन्त्रालका प्रवक्ता रणधीर जयसवालले ‘बिमस्टेक’ मा सहभागी विभिन्न देशका नेताहरूसँग प्रधानमन्त्री मोदीको साइडलाइन भेटवार्ता हुन सक्ने बताए । नेपालका प्रधानमन्त्री ओलीसँग द्विपक्षीय साइडलाइन भेटवार्ता तय भएको हो ? भन्ने कान्तिपुरको जिज्ञासामा उनले सम्भावना रहेको बताए ।
तर भारतीय प्रधानमन्त्री मोदीको भ्रमण तालिकामा भने ओलीसँग भेट हुनेबारे उल्लेख छैन। यद्यपि उनको शुक्रबार दिउँसो ३ बजेदेखि ५ बजेसम्मको समय भने खाली छ। त्यसअवधिमा कुनै कार्यक्रम उल्लेख छैन।
नेपालमा ओली प्रधानमन्त्री भएको साढे ८ महिना भएको छ । तर, अहिलेसम्म ओलीले भारतीय प्रधानमन्त्री मोदीका तर्फबाट भारत भ्रमणको निमन्त्रणf पाएका छैनन् । यसअघि पुष्पकमल दाहाल र त्यसअघि शेरबहादुर देउवाले भारत भ्रमणको अवसर पाएका थिए । ओलीको भारत भ्रमण हुन नसक्नुलाई भारतसँगको सम्बन्धमा चिसोपन आएको रूपमा हेरिँदै आएको छ ।
त्यसकारण पनि थाइल्यान्डमा ओली र मोदीबीच छुट्टै भेट हुने/नहुने विषय बहुप्रतीक्षित छ । प्रधानमन्त्री भएको तीन महिनाभित्रै ओलीले गत असोजमा न्युयोर्कमा मोदीसँग साइडलाइन भेटवार्ताको अवसर पाएका थिए ।
संयुक्त राष्ट्रसंघको ७९ औं महासभाका दौरान साइडलाइन भेटवार्ता भएको हो । त्यसयता ओली र मोदी बिमस्टेकको मञ्चमा भेट्दै छन् । थाइल्यान्डमा द्विपक्षीय भेट भएको खण्डमा भारत वा नेपालबाहिरै मोदीसँग उनको यो दोस्रो भेट हुनेछ ।
भारतीय पत्रिका टाइम्स अफ इन्डियाले मोदीसँग ओलीको भेटका लागि नेपालका तर्फबाट प्रस्ताव आए पनि आधिकारिक पुष्टि भइनसकेको लेखेको छ । बिमस्टेक शिखर सम्मेलनमा मोदीले बंगलादेशका अन्तरिम सरकार प्रमुख सल्लाहकार मोहम्मद युनुससँग पहिलो पटक भेटवार्ता गर्दै छन् ।
बंगलादेशबाट मोदीसँग युनुसको भेटका लागि कूटनीतिक च्यानलबाट आग्रह पठाएको छ । तर, साइडलाइन भेट हुने नहुने अझै आधिकारिक पुष्टि भइसकेको छैन ।
गतवर्ष अगस्टमा त्यहाँ भएको विद्रोहपछि शेख हसिना नेतृत्वको सरकार अपदस्थ भएर युनुसको नेतृत्वमा अन्तरिम सरकार गठन भएको छ । युनुस नेतृत्वको सरकार आएपछि भारतसँगको सम्बन्धमा चिसोपना कायम छ ।
