एस् ए टी भी १४ मङ्सिर,लमजुङ — लमजुङको मर्स्याङ्दी गाउँपालिका-९ भलामचौरको एक घरमा आगलागी हुँदा १ जनाको मृत्यु भएको छ ।
लुकुमारी गुरुङको एक तले ढुंगामाटोले बनेको घरमा बिहीबार राति आगलागी हुँदा अन्दाजी ४५ वर्षीय धर्ती तामाङको मृत्यु भएको जिल्ला प्रहरी प्रमुख डीएसपी निशान्त श्रीवास्तवले बताए ।
उनका अनुसार चितवन घर भएका उनी कामदारको रुपमा २ वर्षदेखि उक्त घरमा बस्दै आएको बुझिएको छ । उनको थप पहिचान खुल्न नसकेको र पोष्टमार्टमका लागि बेंसीसहरस्थित जिल्ला अस्पतालमा राखिएको उनले बताए ।
प्रहरीका अनुसार घर सबै जलेको छ । बिहीबार राति करिब ११ बजेतिर आगो लागेको र २ बजेतिर नियन्त्रणमा ल्याएको स्थानीय तेजबहादुर गुरुङले बताए । आगो नियन्त्रण पछि कामदार तामाङलाई खोजी गर्दा जलेर मृत्यु भएको अवस्थामा फेला परेको उनले बताए ।
तामाङ सुतेको कोठाबाट आगलागी सुरु भएको देखिएको स्थानीय र प्रहरीले अनुमान गरेका छन् । उनी चुरोट खाने भएकाले चुरोटको ठुटोबाट नजिकै रहेको परालमा सल्किएको र त्यसपछि आगलागी भएको हुनसक्ने प्रहरी बताउँछन् । घटनाबारे थप अनुसन्धान भइरहेको प्रहरीले जनाएको छ ।
