सुनसरी । गौहत्या तथा हिन्दु मन्दिरको अगाडि चर्च बनाएको विरोधमा हिन्दुवादीहरूले धरान पुगेर प्रदर्शन गर्ने तयारी गरे पनि उनीहरूलाई तरहरामै रोकिएको छ । तरहरा पानी पियाबाट धरान करिब १८ किलोमिटर टाढा रहेको छ ।
आजको प्रदर्शनलाई ध्यानमा राखेर सुनसरी प्रशासनले शुक्रबार नै निषेधाज्ञा जारी गरेको थियो । त्यही अनुरूप तरहरामा ठुलो सङ्ख्यामा प्रहरी परिचालन गरी आन्दोलनकारीहरूलाई प्रवेश निषेध गरिएको थियो ।
यता इटहरीमा जम्मा भएर हिन्दुवादीहरू करिब ४–५ सयको सङ्ख्या हिँडेर तरहरासम्म पुगेका थिए । त्यहाँ पुगेर नाराबाजी गर्दै टायर बालेर प्रदर्शन गर्न खोजे पनि प्रहरीले उनीहरूको प्रयासलाई विफल बनाएको थियो ।
त्यहाँबाट अघि बढ्न नपाएपछि हिन्दुवादीहरूले सोही क्षेत्रमा सानो कोणसभा गरेका छन् । कोणसभा गरेर करिब साढे ३ बजे उनीहरू त्यहाँबाट फर्केका छन् । हिन्दुवादीहरू फर्किए पनि सवारी आवागमन भने अझै सहज हुन सकेको छैन । तस्बिरहरू हेर्नुहोस् :
