काठमाडौँ, अक्टोबर ३१, २०२५ – रुसियन हाउस, कमलपोखरीमा आजदेखि सुरु भएको काठमाडौँ डरावनी फिल्म महोत्सव (Kathmandu Horror Film Fest – KHFF) को उद्घाटन समारोह अत्यन्तै उत्साहपूर्ण रुपमा सम्पन्न भयो। कार्यक्रममा करिब २५० भन्दा बढी दर्शकहरूको उपस्थिती रहेको थियो, जसले महोत्सवको पहिलो दिनलाई अझ विशेष बनायो।
उद्घाटन समारोहमा रुसियन हाउसकी निर्देशक अनास्तासिया खोखलोभा, नेपाल चलचित्र बोर्डका अध्यक्ष दिनेश डी.सी., तथा महोत्सव निर्देशक रसिक पाठक लगायतका विशिष्ट अतिथिहरू उपस्थित थिए। समारोहमा सहभागीहरूले नेपाली चलचित्र प्रेम र अन्तर्राष्ट्रिय सिनेमाको विविधतालाई आत्मसात गर्दै महोत्सवको महत्वका बारेमा चर्चा गरे।
नेपालमा पहिलोपटक आयोजना गरिएको यस महोत्सवको मुख्य उद्देश्य डर, फ्यान्टासी, र लोककथा आधारित चलचित्रहरूलाई प्रोत्साहन गर्नु मात्र नभई नेपाली दर्शकहरूलाई नयाँ शैलीका कथा र सांस्कृतिक पृष्ठभूमिसँग जोड्नु रहेको छ। महोत्सव निर्देशक रसिक पाठकले उद्घाटन समारोहमा भने,
“यो महोत्सव केवल डराउने फिल्मका लागि होइन, यो नेपाली दर्शकलाई नयाँ शैलीका कथा र सांस्कृतिक पृष्ठभूमिसँग जोड्ने प्रयास हो।”
उद्घाटन फिल्मको रूपमा रूसी चलचित्र ‘Shaman’ प्रदर्शन गरिएको थियो, जसलाई मिखाइल मर्जलिकिनले निर्देशन गरेका हुन्। फिल्मको कथा, निर्देशन, र दृश्य प्रस्तुतिले दर्शकहरूलाई पूर्णरूपले मन्त्रमुग्ध बनायो। दर्शकहरूले फिल्मको प्रस्तुतीकरणलाई उत्साहपूर्वक स्वागत गरे, र हल पूर्णरूपमा भरिएको देखिन्थ्यो।
यो महोत्सवले १५ देशका २५ वटा चलचित्र प्रदर्शन गर्दै दर्शकहरूलाई अन्तर्राष्ट्रिय सिनेमाको अनुभव प्रदान गर्दैछ। महोत्सवको आयोजना हेलोविनको अवसरसँग पनि मेल खाँदै, डर, रोमाञ्चकता र सांस्कृतिक विविधतालाई एकै साथ प्रस्तुत गर्ने उद्देश्य राखेको छ।
नेपाल फिल्म एण्ड कल्चरल एकेडेमीको आयोजनामा र नेपाल अन्तर्राष्ट्रिय फिल्म महोत्सव (NIFF) को सहकार्यमा सम्पन्न यो तीन दिने महोत्सव अक्टोबर ३१ देखि नोभेम्बर २ सम्म चल्नेछ। महोत्सवले नेपाली फिल्म उद्योग र अन्तर्राष्ट्रिय सिनेमाको सेतु निर्माण गर्दै दर्शकहरूलाई सांस्कृतिक र सिर्जनात्मक अनुभव प्रदान गर्ने विश्वास व्यक्त गरिएको छ।
