सहकारी ठगी प्रकरण छानविनका लागि गठन गर्ने भनिएको संसदीय समितिको कार्यक्षेत्र टुंगो लगाउन बसेको सत्ता र प्रतिपक्षका शीर्ष नेताहरुको बैठक निष्कर्षविहीन भएको छ ।
आज बिहान प्रधानमन्त्रीको सरकारी निवास बालुवाटारमा समितिको कार्यक्षेत्र निर्धारण गर्न बनेको कार्यदलका सदस्य समेतलाई राखेर शीर्ष नेताहरुले छलफल गरेका थिए । तर, सहमति नजुटेपछि नेताहरु साँझ पुन: बस्नेगरी उठेका छन् ।
प्रधानमन्त्री पुष्पकमल दाहाल प्रचण्डले अधिकतम प्रयास गर्दागर्दै सत्ता गठबन्धनका अन्य नेताहरुका कारण सहमति हुन नसकेको नेपाली कांग्रेसका सहमहामन्त्री जीवन परियारले बताए । छलफल सकारात्मक भएको र साँझ सहमति कायम हुने उनले विश्वास व्यक्त गरे ।
सहकारी ठगीमा जोडिएका गृहमन्त्री रवि लामिछानेको नाम तोकेरै समिति गठन गर्नुपर्ने कांग्रेसको अडानमा सत्तापक्ष सहमत नभएको परियारले जानकारी दिए । प्रधानमन्त्री प्रचण्डले साँझसम्म दुवै पक्षको कुरा सुनेर सहमतिमा पुग्ने विश्वास दिलाएको उनले बताए ।
कांग्रेसले दिउँसो १ बजे पदाधिकारी तथा पूर्वपदाधिकारीको बैठक बोलाएको छ । त्यसपछि अपराह्न सभापति शेरबहादुर देउवाले प्रधानमन्त्री भेट्ने बताइएको छ ।
