एस् ए टि भी，मङ्गसिर १४ गते । नेपाल उद्योग वाणिज्य महासङ्घले हरेक वर्ष आयोजना गर्दै आएको नेपाल अन्तर्राष्ट्रिय व्यापार मेला बिहीबारदेखि भृकुटीमण्डपमा सुरु भएको छ । प्रतिनिधिसभाका सभामुख देवराज घिमिरेले प्रदर्शनीको उद्घाटन गर्नुभएको थियो।
स्वदेशी उत्पादनलाई अन्तर्राष्ट्रिय बजारमा प्रवर्द्धन गर्ने उद्देश्यले नेपाल अन्तर्राष्ट्रिय व्यापार मेलाको आयोजना गरिएको हो । ‘नेपाली वस्तु प्रवर्द्धन, समृद्ध नेपाल निर्माण’ भन्ने नारासहित सुरु भएको मेला मंसिर १८ गतेसम्म चल्नेछ। मेलामा चीन, भारत, पाकिस्तान र बङ्गलादेश लगायतका देशहरूको सहभागिता रहेको छ । मेलामा नेपाली युवा उद्यमी मञ्चद्वारा मेड इन नेपाल पेभेलियन र जुत्ता उत्पादक सङ्घको तर्फबाट ४० वटा स्टलसहितको पेभेलियन रहेको छ ।
महासङ्घका अनुसार मेलामा चीनबाट ५५, भारतबाट ३०, बङ्गलादेशबाट आठ र पाकिस्तानबाट आठ गरी २१० वटा स्टलमा स्वदेशी तथा विदेशी वस्तुको प्रदर्शनी गरिएको छ । नेपालका लागि चिनियाँ राजदूत र सभामुखले मेलाको अवलोकन गर्नु भएको छ ।
नेपाल उद्योग वाणिज्य महासंघको आयोजनामा सुरु भएको मेलामा नेपालसहित भारत, चीन, बंगलादेश र पाकिस्तानी ब्रान्डका तयारी कपडा, पस्मिना, हस्तकला, मेकअप आइटम लगायत अन्य सामानहरू पनि प्रदर्शनी गरिएको छ।
यस विशेष कार्यक्रममा पाकिस्तानी र बंगलादेशका स्टलहरू， नेपालमैं बसोबास गर्ने अन्तराष्ट्रिय व्यापारीहरूले राखेका हुन् । चिनियाँ र भारतीय व्यापारीहरु भने विशेष यही कार्यक्रमलाई सम्बोधन गर्न नेपाल आएका हुन् जसमा इन्डियन चेम्बर अफ कमर्श र चीन सरकारले विशेष सहयोग पुर्याएको छ।
“निजी क्षेत्र देशको आर्थिक विकासको स्तम्भ हो, निजी क्षेत्रका व्यापार र व्यापारीका समस्याबारे म राम्ररी जानकार छु । म संसदीय सदस्य र सभामुखको हैसियतमा सबै महत्वपूर्ण भूमिका निर्वाह गर्नेछु।" कार्यक्रमका प्रमुख अतिथी प्रतिनिधिसभाका सभामुख देवराज घिमिरेले बताउनु भयो।
एस ए टी भी काे क्यामेरामा कैद आजका केही तस्बिरहरू:
