काठमाडौँ । राजधानीको भृकुटीमण्डप प्रदर्शनी हलमा नेपालकै सबैभन्दा ठूलो उपभोक्ता मेलाको दोस्रो संस्करण ‘ग्लोबल कन्जुमर एक्स्पो २०२६’ बिहीबारबाट आधिकारिक रूपमा सुरु भएको छ। यस मेलाको मुख्य नारा नै ‘सपिङको नयाँ ठेगाना’ राखिएको छ, जसले एकै ठाउँमा सबै प्रकारका उपभोग्य वस्तुहरू खरिद गर्ने सुविधा उपलब्ध गराएको आयोजकले बताएका छन्।
पाँच दिनसम्म चल्ने यो मेला जेठ २९ गतेदेखि असार २ गतेसम्म सञ्चालन हुनेछ। आयोजक फर्म इभेन्ट सोलुसनका अनुसार मेलामा देशी तथा विदेशी गरी १०० भन्दा बढी प्रदर्शक कम्पनीहरू सहभागी भएका छन्। मेलामा दैनिक उपभोग्य वस्तु, घरेलु तथा किचन सामान, इलेक्ट्रोनिक्स, फेसन कपडा, सौन्दर्य उत्पादन, प्रविधि सामान, हस्तकलाका सामान तथा गहना लगायतका सबै किसिमका वस्तुहरू प्रदर्शन र बिक्री गरिएको छ।
मेलाको मुख्य उद्देश्य व्यवसायीहरू बीचको बिजनेस टु बिजनेस (B2B) सम्बन्ध विस्तार गर्न र आम उपभोक्तालाई ब्रान्डेड वस्तुहरू एकै स्थानमा किन्नको अवसर दिनु रहेको आयोजकको भनाइ छ। मेलाको अवधिभरमा कुल ३५ हजारभन्दा बढी आगन्तुकहरू आउने अनुमान गरिएको छ।
उपभोक्ताको अनुभवलाई राम्रो बनाउन मेलामा विशेष अन्तरक्रियात्मक जोन पनि बनाइएको छ, जहाँ आगन्तुकहरूले नयाँ प्रविधिका सामानहरू प्रत्यक्ष प्रयोग गरेर हेर्न सक्छन्। प्रवेश शुल्क मात्र ५० रुपैयाँ राखिएको छ, जसको उद्देश्य भीड व्यवस्थापन गर्नु र प्रदर्शक तथा ग्राहकबीच अर्थपूर्ण सम्वाद स्थापना गर्नु रहेको बताइएको छ।
उद्योग तथा वाणिज्य क्षेत्रका व्यवसायीहरूले यस एक्स्पोले देशको आर्थिक गतिविधिलाई चलायमान बनाउने र साना तथा मझौला उद्यमीहरूको बजार विस्तारमा ठूलो मद्दत पुग्ने आशा व्यक्त गरेका छन्। आम सर्वसाधारणले पनि एकै ठाउँमा विभिन्न ब्रान्डका वस्तुहरू तुलना गरेर सस्तो मूल्यमा खरिद गर्न पाउने भएकाले मेलाप्रति आकर्षण बढेको देखिएको छ।
मेलाको समय बिहान १० बजेदेखि साँझ ७ बजेसम्म तोकिएको छ।
